oṃ śrī gurubhyo namaḥ | ha̱ri̱ḥ oṃ |

oṃ śaṃ no̍ mi̱traḥ śaṃ varu̍ṇaḥ | śaṃ no̍ bhavatvarya̱mā |
śaṃ na̱ indro̱ bṛha̱spati̍ḥ | śaṃ no̱ viṣṇu̍rurukra̱maḥ |
namo̱ brahma̍ṇe | nama̍ste vāyo | tvame̱va pra̱tyakṣa̱ṃ brahmā̍si |
tvame̱ vapra̱tyakṣa̱ṃ brahma̍ vadiṣyāmi | ṛ̱taṃ va̍diṣyāmi |
sa̱tyaṃ va̍diṣyāmi | tanmāma̍vatu | tadva̱ktāra̍mavatu |
ava̍tu̱ mām | ava̍tu va̱ktāra̍m |

oṃ śānti̱ḥ śānti̱ḥ śānti̍ḥ || 1|| iti prathamo'nuvākaḥ ||

oṃ śīkṣāṃ vyā̍khyāsyā̱maḥ | varṇa̱ḥ svaraḥ | mātrā̱ balam |
sāma̍ santā̱naḥ | ityuktaḥ śī̍kṣādhyā̱yaḥ || 2||

sa̱ha nau̱ yaśaḥ | saha nau bra̍hmavarcasam |
athātaḥ sagṃ hitāyā upaniṣadam vyā̍khyāsyā̱maḥ |
pañcasvadhika̍raṇe̱ṣu | adhilokamadhi-jyautiṣa-
madhividya-madhipraja̍-madhyā̱tmam |
tā mahāsagṃhitā i̍tyāca̱kṣate | athā̍dhilo̱kam |
pṛthivī pū̍rvarū̱pam | dyaurutta̍rarū̱pam | ākā̍śaḥ sa̱ndhiḥ || 3||

vāyu̍ḥ sandhā̱nam | itya̍dhilo̱kam | athā̍dhijyau̱tiṣam |
agniḥ pū̍rvarū̱pam | āditya utta̍rarū̱pam | ā̍paḥ sa̱ndhiḥ |
vaidyuta̍ḥ sandhā̱nam | itya̍dhijyau̱tiṣam | athā̍dhivi̱dyam |
ācāryaḥ pū̍rvarū̱pam || 4||

antevāsyutta̍rarū̱pam | vi̍dyā sa̱ndhiḥ | pravacana̍gṃ sandhā̱nam |
itya̍dhivi̱dyam | athādhi̱prajam | mātā pū̍rvarū̱pam | pitotta̍rarū̱pam |
pra̍jā sa̱ndhiḥ | prajanana̍gṃ sandhā̱nam | ityadhi̱prajam || 5||

athādhyā̱tmam | adharā hanuḥ pū̍rvarū̱pam | uttarā hanurutta̍rarū̱pam |
vāksa̱ndhiḥ | jihvā̍sandhā̱nam | ityadhyā̱tmam |
itīmā ma̍hāsa̱gṃ hitāḥ | ya evametā mahāsagṃ hitā vyākhyā̍tā ve̱da |
sandhīyate praja̍yā pa̱śubhiḥ | brahmavarcasenānnādyena suvargyeṇa̍ loke̱na || 6||

yaśchanda̍sā-mṛṣabho vi̱śvarū̍paḥ |
chando̱bhyo'dhya̱mṛtā̍tsaṃba̱bhūva̍ |
sa mendro̍ me̱dhayā̍ spṛṇotu |

a̱mṛta̍sya deva̱ dhāra̍ṇo bhūyāsam |
śarī̍raṃ me̱ vica̍rṣaṇam | ji̱hvā me̱ madhu̍mattamā |
karṇā̍bhyāṃ bhūri̱ viśru̍vam |
brahma̍ṇaḥ ko̱śo̎si me̱dhayā pi̍hitaḥ |
śru̱taṃ me̍ gopāya | ā̱vaha̍ntī vitanvā̱nā || 7||

ku̱rvā̱ṇā'cīra̍mā̱tmana̍ḥ | vāsā̍gṃ si̱ mama̱ gāva̍śca |
a̱nna̱pā̱ne ca̍ sarva̱dā | tato̍ me̱ śriya̱māva̍ha |
lo̱ma̱śāṃ pa̱śubhi̍ḥ sa̱ha svāhā̍ | ā mā̍yantu brahmacā̱riṇa̱ḥ svāhā̍ |
vi mā̎'yantu brahmacā̱riṇa̱ḥ svāhā̍ |
pra mā̎'yantu brahmacā̱riṇa̱ḥ svāhā̍ |
damā̍yantu brahmacā̱riṇa̱ḥ svāhā̍ |
śamā̍yantu brahmacā̱riṇa̱ḥ svāhā̍ || 8||

yaśo̱ jane̎sāni̱ svāhā̍ | śreyā̱n vasya̍so'sāni̱ svāhā̍ |
taṃ tvā̍ bhaga̱ pravi̍śāni̱ svāhā̍ | sa mā̍ bhaga̱ pravi̍śa̱ svāhā̍ |
tasmi̍n tsahasra̍śākhe nibha̍gā̱haṃ tvayi̍ mṛje̱ svāhā̍ |
yathā''pa̱ḥ prava̍tā̱''yanti̍ yathā̱ māsā̍ aharja̱ram |
e̱vaṃ māṃ bra̍hmacā̱riṇa̍ḥ | dhāta̱rāya̍ntu sa̱rvata̱ḥ svāhā̍ |
pra̱ti̱ve̱śo̎si̱ pra mā̍ bhāhi̱ pra mā̍ padyasva || 9||

bhūrbhuva̱ḥ suva̱riti̱ vā e̱tāsti̱sro vyāhṛ̍tayaḥ |
tāsā̍mu ha smai̱tāṃ ca̍tu̱rthīm | māhā̍camasya̱ḥ prave̍dayate |
maha̱ iti | tat brahma̍ | sa ā̱tmā | aṅgā̍nya̱nyā de̱vatā̍ḥ |
bhūriti̱ vā a̱yaṃ lo̱kaḥ | bhuva̱ itya̱ntari̍kṣam | suva̱ritya̱sau lo̱kaḥ || 10||

maha̱ ityā̍di̱tyaḥ | ā̱di̱tyena̱ vāva sarve̍ lo̱ka mahī̍yante |
bhūriti̱ vā a̱gniḥ | bhuva̱ iti̍ vā̱yuḥ | suva̱rityā̍di̱tyaḥ |
maha̱ iti̍ candramā̍ḥ | ca̱ndrama̍sā̱ vāva
sarvā̍ṇi̱ jyotī̍gṃ ṣi̱ mahī̍yante | bhūriti̱ vā ṛcaḥ |
bhuva̱ iti̱ sāmā̍ni | suva̱riti̱ yajū̍gṃ ṣi || 11||

maha̱ iti̱ brahma̍ | brahma̍ṇā̱ vāva sarve̍ ve̱dā mahī̍yante |
bhūriti̱ vai prā̱ṇaḥ | bhuva̱ itya̍pā̱naḥ | suva̱riti̍ vyā̱naḥ |
maha̱ ityanna̍m | anne̍na̱ vāva sarve̍ prā̱ṇa mahī̍yante |
tā vā e̱tāścata̍sraścatu̱rdha | cata̍sraścatasro̱ vyāhṛ̍tayaḥ |
tā yo veda̍ | sa veda̱ brahma̍ | sarve̎smai de̱vā ba̱limāva̍hanti || 12||

sa ya e̱ṣo̎nta̍rahṛdaya ākā̱śaḥ | tasmi̍nna̱yaṃ puru̍ṣo mano̱maya̍ḥ |
amṛ̍to hira̱ṇmaya̍ḥ | anta̍reṇa̱ tālu̍ke | ya e̱ṣa stana̍ ivāva̱laṃba̍te |
se̍ndrayo̱niḥ | yatrā̱sau ke̍śā̱nto vi̱varta̍te | vya̱pohya̍ śīrṣakapā̱le |
bhūritya̱gnau prati̍tiṣṭhati | bhuva̱ iti̍ vā̱yau || 13||

suva̱rityā̍di̱tye | maha̱ iti̱ brahma̍ṇi | ā̱pnoti̱ svārā̍jyam |
ā̱pnoti̱ mana̍sa̱spati̍m | vākpa̍ti̱ścakṣu̍ṣpatiḥ |
śrotra̍patirvi̱jñāna̍patiḥ | e̱tattato̍ bhavati | ā̱kā̱śaśa̍rīra̱ṃ brahma̍ |
sa̱tyātma̍ prā̱ṇārā̍ma̱ṃ mana̍ āna̱ndam |
śānti̍samṛddhama̱mṛta̍m | iti̍ prācīnayo̱gyopā̍ssva || 14||

pṛ̱thi̱vya̍ntarikṣa̱ṃ dyaurdiśo̎vāntaradi̱śāḥ |
a̱gnirvā̱yurā̍di̱tyaśca̱ndramā̱ nakṣa̍trāṇi |
āpa̱ oṣa̍dhayo̱ vana̱spata̍ya ākā̱śa ā̱tmā | itya̍dhibhū̱tam |
athādhyā̱tmam | prā̱ṇo vyā̱no̎pā̱na u̍dā̱naḥ sa̍mā̱naḥ |
cakṣu̱ḥ śrotra̱ṃ mano̱ vāk tvak |
carma̍ mā̱gṃ sagṃ snāvāsthi̍ ma̱jjā |
e̱tada̍dhivi̱dhāya̱ ṛṣi̱ravo̍cat | pāṅkta̱ṃ vā i̱dagṃ sarva̍m |
pāṅkte̍nai̱va pāṅkta̍gṃ spṛṇo̱tīti̍ || 15||

omiti̱ brahma̍ | omitī̱dagṃ sarva̍m |
omitye̱ta-da̍nukṛtir-ha sma̱ vā a̱pyo śrā̍va̱yetyā-śrā̍vayanti |
omiti̱ sāmā̍ni gāyanti | ogṃ śomiti̍ śa̱strāṇi̍ śagṃ santi |
omitya̍dhva̱ryuḥ pra̍tiga̱raṃ prati̍gṛṇāti | omiti̱ brahmā̱ prasau̍ti |
omitya̍gniho̱tra-manu̍jānāti | omiti̍ brāhma̱ṇaḥ
pra̍va̱kṣyannā̍ha brahmopā̍pnavā̱nīti̍ | brahmai̱vopā̍pnoti || 16||

ṛtaṃ ca svādhyāyaprava̍ca̱ne ca |
satyaṃ ca svādhyāyaprava̍cane̱ ca |
tapaśca svādhyāyaprava̍cane̱ ca |
damaśca svādhyāyaprava̍cane̱ ca |
śamaśca svādhyāyaprava̍cane̱ ca |
agnayaśca svādhyāyaprava̍cane̱ ca |
agnihotraṃ ca svādhyāyaprava̍cane̱ ca |
atithayaśca svādhyāyaprava̍cane̱ ca |
mānuṣaṃ ca svādhyāyaprava̍cane̱ ca |
prajā ca svādhyāyaprava̍cane̱ ca |
prajanaśca svādhyāyaprava̍cane̱ ca |
prajātiśca svādhyāyaprava̍cane̱ ca |
satyamiti satyavacā̍ rāthī̱taraḥ |
tapa iti taponityaḥ pauru̍śi̱ṣṭiḥ |
svādhyāyapravacane eveti nāko̍ maudga̱lyaḥ |
taddhi tapa̍staddhi̱ tapaḥ || 17||

a̱haṃ vṛ̱kṣasya̱ reri̍vā | kī̱rtiḥ pṛ̱ṣṭhaṃ gi̱reri̍va |
ū̱rdhvapa̍vitro vā̱jinī̍va sva̱mṛta̍masmi | dravi̍ṇa̱gṃ sava̍rcasam |
sumedha a̍mṛto̱kṣitaḥ | iti triśaṅkorvedā̍nuva̱canam || 18||

vedamanūcy-ācāryontevāsina-ma̍nuśā̱sti |
satya̱ṃ vada | dharma̱ṃ cara | svādhyā̍yānmā pra̱madaḥ |
ācāryāya priyaṃ dhanamāhṛtya prajātantuṃ mā vya̍vacche̱tsīḥ |
satyānna prama̍dita̱vyam | dharmānna prama̍dita̱vyam |
kuśalānna prama̍dita̱vyam | bhūtyai na prama̍dita̱vyam |
svādhyāyapravacanābhyāṃ na prama̍dita̱vyam || 19||

devapitṛkāryābhyāṃ na prama̍dita̱vyam | mātṛ̍devo̱ bhava |
pitṛ̍devo̱ bhava | ācārya̍devo̱ bhava | atithi̍devo̱ bhava |
yānyanavadyāni̍ karmā̱ṇi | tāni sevi̍tavyā̱ni | no i̍tarā̱ṇi |
yānyasmākagṃ suca̍ritā̱ni | tāni tvayo̍pāsyā̱ni || 20||

no i̍tarā̱ṇi | ye ke cārumacchreyā̍gṃ so brā̱hmaṇāḥ |
teṣāṃ tvayā''sanena praśva̍sita̱vyam | śraddha̍yā de̱yam |
aśraddha̍yā'de̱yam | śriyā de̱yam | hri̍yā de̱yam | bhi̍yā de̱yam |
saṃvi̍dā de̱yam | atha yadi te karmavicikitsā vā vṛttaviciki̍tsā vā̱ syāt || 21||

ye tatra brāhmaṇā̍ḥ saṃma̱rśinaḥ | yuktā̍ āyu̱ktāḥ |
alūkṣā̍ dharma̍kāmā̱ḥ syuḥ | yathā te̍ tatra̍ varte̱ran |
tathā tatra̍ varte̱thāḥ | athābhyā̍khyā̱teṣu |
ye tatra brāhmaṇā̍ḥ saṃma̱rśinaḥ | yuktā̍ āyu̱ktāḥ |
alūkṣā̍ dharmakāmā̱ḥ syuḥ | yathā te̍ teṣu̍ varte̱ran |
tathā teṣu̍ varte̱thāḥ | eṣa̍ āde̱śaḥ | eṣa u̍pade̱śaḥ |
eṣā ve̍dopa̱niṣat | etada̍nuśā̱sanam | evamupā̍sita̱vyam |
evamu caita̍dupā̱syam || 22||

śaṃ no̍ mi̱traḥ śaṃ varu̍ṇaḥ | śaṃ no̍ bhavatvarya̱mā |
śaṃ na̱ indro̱ bṛha̱spatiḥ | śaṃ no viṣṇu̍rurukra̱maḥ |
namo̱ brahma̍ṇe | nama̍ste vāyo | tvame̱va pra̱tyakṣa̱ṃ brahmā̍si |
tvāme̱va pra̱tyakṣa̱ṃ brahmāvā̍diṣam | ṛ̱tama̍vādiṣam |
sa̱tyama̍vādiṣam | tanmāmā̍vīt | tadva̱ktāra̍māvīt |
āvī̱nmām | āvī̍dva̱ktāra̍m | oṃ śānti̱ḥ śānti̱ḥ śānti̍ḥ ||

oṃ sa̱ha nā̍vavatu | sa̱ha nau̍ bhunaktu | sa̱ha vī̱rya̍ṃ karavāvahai |
te̱ja̱svi nā̱vadhī̍tamastu̱ mā vi̍dviṣā̱vahai̍ |
oṃ śānti̱ḥ śānti̱ḥ śānti̍ḥ ||

oṃ bra̱hma̱vidā̍pnoti̱ para̍m | tade̱ṣā'bhu̍ktā |
sa̱tyaṃ jñā̱nama̍na̱ntaṃ brahma̍ | yo ve̍da̱ nihi̍ta̱ṃ guhā̱yāṃ para̱me vyo̍man |
so̎śnu̱te sarvā̱n kāmā̍ntsa̱ha | brahma̍ṇā vipa̱ściteti̍ ||
tasmā̱dvā e̱tasmā̍dā̱tmana̍ ākā̱śaḥ saṃbhū̍taḥ | ā̱kā̱śādvā̱yuḥ |
vā̱yora̱gniḥ | a̱gnerāpa̍ḥ | a̱dbhyaḥ pṛ̍thivī̱ |

pṛ̱thi̱vyā oṣa̍dhayaḥ | oṣa̍dhī̱bhyonna̍m | annā̱tpuru̍ṣaḥ |
sa vā eṣa puruṣo'nnna̍rasa̱mayaḥ | tasyeda̍meva̱ śiraḥ |
ayaṃ dakṣi̍ṇaḥ pa̱kṣaḥ | ayamutta̍raḥ pa̱kṣaḥ | ayamātmā̍ |
idaṃ puccha̍ṃ prati̱ṣṭhā | tadapyeṣa ślo̍ko bha̱vati || 1||

annā̱dvai pra̱jāḥ pra̱jāya̍nte | yāḥ kāśca̍ pṛthi̱vīgṃ
śri̱tāḥ | atho̱ annenai̱va jī̍vanti | athai̍na̱dīpa̍ yantyanta̱taḥ |
anna̱gṃ hi bhū̱tānā̱ṃ jyeṣṭha̍m | tasmā̍t sarvauṣa̱dhamu̍cyate |
sarva̱ṃ vai te'nna̍māpnuvanti | ye'nna̱ṃ brahmo̱pāsa̍te |
anna̱gṃ hi bhū̱tānā̱ṃ jyeṣṭha̍m | tasmā̍t sarvauṣa̱dhamu̍cyate |
annā̍d bhū̱tāni̱ jāya̍nte | jā̱tānyannen̍a vardhante |
adyate'tti ca̍ bhūtā̱ni | tasmādannaṃ taducya̍ta i̱ti |
tasmādvā etasmādanna̍rasa̱mayāt | anyo'ntara ātmā̍ prāṇa̱mayaḥ |
tenai̍ṣa pū̱rṇaḥ | sa vā eṣa puruṣavi̍dha e̱va |
tasya puru̍ṣavi̱dhatām | anvaya̍ṃ puruṣa̱vidhaḥ |
tasya prāṇa̍ eva̱ śiraḥ | vyāno dakṣi̍ṇaḥ pa̱kṣaḥ |
apāna utta̍raḥ pa̱kṣaḥ | ākā̍śa ā̱tmā |
pṛthivī puccha̍ṃ prati̱ṣṭhā | tadapyeṣa śloko̍ bha̱vati || 2||

prā̱ṇaṃ de̱vā anu̱ prāṇa̍nti | ma̱nu̱ṣyā̍ḥ pa̱śava̍śca̱ ye |
prā̱ṇo hi bhū̱tānā̱māyu̍ḥ | tasmā̍t sarvāyu̱ṣamu̍cyate |
sarva̍me̱va ta̱ āyu̍ryanti | ye prā̱ṇaṃ brahmo̱pāsa̍te |
prāṇo hi bhūtā̍nāmā̱yuḥ | tasmāt sarvāyuṣamucya̍ta i̱ti |
tasyaiṣa eva śārī̍ra ā̱tmā | ya̍ḥ pūrva̱sya |
tasmādvā etasmā̍t prāṇa̱mayāt | anyo'ntara ātmā̍ mano̱mayaḥ |
tenai̍ṣa pū̱rṇaḥ | sa vā eṣa puruṣavi̍dha e̱va |
tasya puru̍ṣavi̱dhatām | anvaya̍ṃ puruṣa̱vidhaḥ |
tasya yaju̍reva̱ śiraḥ | ṛgdakṣi̍ṇaḥ pa̱kṣaḥ | sāmotta̍raḥ pa̱kṣaḥ |
āde̍śa ā̍tmā | atharvāṅgirasaḥ puccha̍ṃ prati̱ṣṭhā |
tadapyeṣa śloko̍ bha̱vati || 3||

yato̱ vāco̱ niva̍rtante | aprā̍pya̱ mana̍sā sa̱ha |
ānandaṃ brahma̍ṇo vi̱dvān | na bibheti kadā̍cane̱ti |
tasyaiṣa eva śārī̍ra ā̱tmā | ya̍ḥ pūrva̱sya |
tasmādvā etasmā̍nmano̱mayāt | anyo'ntara ātmā vi̍jñāna̱mayaḥ |
tenai̍ṣa pū̱rṇaḥ | sa vā eṣa puruṣavi̍dha e̱va |
tasya puru̍ṣavi̱dhatām | anvaya̍ṃ puruṣa̱vidhaḥ |
tasya śra̍ddhaiva̱ śiraḥ | ṛtaṃ dakṣi̍ṇaḥ pa̱kṣaḥ |
satyamutta̍raḥ pa̱kṣaḥ | yo̍ga ā̱tmā | mahaḥ puccha̍ṃ prati̱ṣṭhā |
tadapyeṣa śloko̍ bha̱vati || 4||

vi̱jñāna̍ṃ ya̱jñaṃ ta̍nute | karmā̍ṇi tanu̱te'pi̍ ca |
vi̱jñāna̍ṃ de̱vāḥ sarve̍ | brahma̱ jyeṣṭha̱mupā̍sate |
vi̱jñāna̱ṃ brahma̱ cedveda̍ | tasmā̱ccenna pramādyati |
śarīre̍ pāpma̍no hi̱tvā | sarvānkāmān tsamaśnu̍ta i̱ti |
tasyaiṣa eva śārī̍ra ā̱tmā | ya̍ḥ pūrva̱sya |
tasmādvā etasmādvijñāna̱mayāt | anyo'ntara ātmā̎'nandamayaḥ |
tenai̍ṣa pū̱rṇa̍ḥ | sa vā eṣa puruṣavi̍dha e̱va |
tasya puru̍ṣavi̱dhatām | anvaya̍ṃ puru̱ṣavidhaḥ |
tasya priya̍meva̱ śiraḥ | modo dakṣi̍ṇaḥ pa̱kṣaḥ | pramoda utta̍raḥ pa̱kṣaḥ |
āna̍nda ā̱tmā | brahma pucchaṃ prati̱ṣṭhā |
tadapyeṣa śloko̍ bha̱vati || 5||

asa̍nne̱va sa̍ bhavati | asa̱dbrahmeti̱ veda̱ cet |
asti brahmeti̍ cedve̱da | santamenaṃ tato vi̍duri̱ti |
tasyaiṣa eva śārīra ā̱tmā | ya̍ḥ pūrva̱sya |
athāto̎nupra̱śnāḥ | u̱tāvi̱dvāna̱muṃ lo̱kaṃ pretya̍ |
kaśca̱na ga̍ccha̱tī 3|
āho̍ vi̱dvāna̱muṃ lo̱kaṃ pretya̍ kaści̱tsama̍śnu̱tā 3 u̱ |
so̎kāmayata | ba̱hu syā̱ṃ prajā̍ye̱yeti̍ | sa tapo̎tapyata | sa tapa̍sta̱ptvā |
i̱dagṃ sarva̍masṛjata | yadi̱daṃ kiñca̍ | tatsṛ̱ṣṭvā |
tade̱vānu̱prāvi̍śat | tada̍nu pra̱viśya̍ | sacca̱ tyaccā̍bhavat |
ni̱rukta̱ṃ cāni̍ruktaṃ ca | ni̱laya̍na̱ṃ cāni̍layanaṃ ca |
vi̱jñāna̱ṃ cāvi̍jñānaṃ ca | satyaṃ cānṛtaṃ ca sa̍tyama̱bhavat |
yadi̍daṃ ki̱ñca | tatsatyami̍tyāca̱kṣate |
tadapyeṣa śloko̍ bha̱vati || 6||

asa̱dvā i̱damagra̍ āsīt | tato̱ vai sada̍jāyata |
tadātmānagṃ svaya̍maku̱ruta | tasmāttatsukṛtamucya̍ta i̱ti |
yadvai̍ tat su̱kṛtam | ra̍so vai̱ saḥ |
rasagṃ hyevāyaṃ labdhvā''na̍ndī bha̱vati | ko hyevānyā̍tkaḥ
prāṇyāt | yadeṣa ākāśa āna̍ndo na syāt | eṣa hyevā''na̍ndayā̱ti |
ya̱dā hye̍vaiṣa̱ etasminnadṛśye'nātmye'nirukte'nilayane'bhayaṃ
prati̍ṣṭhāṃ vi̱ndate | atha so'bhayaṃ ga̍to bha̱vati |
ya̱dā hye̍vaiṣa̱ etasminnudaramanta̍raṃ ku̱rute |
atha tasya bha̍yaṃ bha̱vati | tatveva bhayaṃ viduṣo'ma̍nvāna̱sya |
tadapyeṣa śloko̍ bha̱vati || 7||

bhī̱ṣā'smā̱dvāta̍ḥ pavate | bhī̱ṣode̍ti̱ sūrya̍ḥ |
bhī̱ṣā'smādagni̍ścendra̱śca | mṛtyurdhāvati pañca̍ma i̱ti |
saiṣā''nandasya mī̍māgṃ gṃ sā bha̱vati |
yuvā syātsādhuyu̍vā'dhyā̱yakaḥ | āśiṣṭho dṛḍhiṣṭho̍ bali̱ṣṭhaḥ |
tasyeyaṃ pṛthivī sarvā vittasya̍ pūrṇā̱ syāt |
sa eko mānuṣa̍ āna̱ndaḥ | te ye śataṃ mānuṣā̍ āna̱ndāḥ |
sa eko manuṣyagandharvāṇā̍māna̱ndaḥ | śrotriyasya cākāma̍hata̱sya |
te ye śataṃ manuṣyagandharvāṇā̍māna̱ndāḥ |
sa eko devagandharvāṇā̍māna̱ndaḥ | śrotriyasya cākāma̍hata̱sya |
te ye śataṃ devagandharvāṇā̍māna̱ndāḥ |
sa ekaḥ pitṛṇāṃ ciralokalokānā̍māna̱ndaḥ |
śrotriyasya cākāma̍hata̱sya |
te ye śataṃ pitṛṇāṃ ciralokalokānā̍māna̱ndāḥ |
sa eka ājānajānāṃ devānā̍māna̱ndaḥ |
śrotriyasya cākāma̍hata̱sya |
te ye śataṃ ājānajānāṃ devānā̍māna̱ndāḥ |
sa ekaḥ karmadevānāṃ devānā̍māna̱ndaḥ |
ye karmaṇā devāna̍piya̱nti | śrotriyasya cākāma̍hata̱sya |
te ye śataṃ karmadevānāṃ devānā̍māna̱ndāḥ |
sa eko devānā̍māna̱ndaḥ | śrotriyasya cākāma̍hata̱sya |
te ye śataṃ devānā̍māna̱ndāḥ | sa eka indra̍syā''na̱ndaḥ |
śrotriyasya cākāma̍hata̱sya | te ye śatamindra̍syā''na̱ndāḥ |
sa eko bṛhaspate̍rāna̱ndaḥ | śrotriyasya cākāma̍hata̱sya |
te ye śataṃ bṛhaspate̍rāna̱ndāḥ | sa ekaḥ prajāpate̍rāna̱ndaḥ |
śrotriyasya cākāma̍hata̱sya | te ye śataṃ prajāpate̍rāna̱ndāḥ |
sa eko brahmaṇa̍ āna̱ndaḥ | śrotriyasya cākāma̍hata̱sya |
sa yaścā̍yaṃ pu̱ruṣe | yaścāsā̍vādi̱tye | sa eka̍ḥ |
sa ya̍ eva̱ṃvit | asmāllo̍kātpre̱tya |

eta mannamayam-ātmāna-mupa̍saṅkrā̱mati |
etaṃ prāṇamayam-ātmāna-mupa̍saṅkrā̱mati |
etaṃ manomayam-ātmāna-mupa̍saṅkrā̱mati |

etaṃ vijñānamayam-ātmāna-mupa̍saṅkrā̱mati |
etamānandamayam-ātmāna-mupa̍saṅkrā̱mati |
tadapyeṣa śloko̍ bha̱vati || 8||

yato̱ vāco̱ niva̍rtante | aprā̍pya̱ mana̍sā sa̱ha |
ānandaṃ brahma̍ṇo vi̱dvān | na bibheti kuta̍ścane̱ti |
etagṃ ha vāva̍ na ta̱pati | kimahagṃ sādhu̍ nāka̱ravam |
kimahaṃ pāpamakara̍vami̱ti | sa ya evaṃ vidvānete ātmā̍nagṃ spṛ̱ṇute |
u̱bhe hye̍vaiṣa̱ ete ātmā̍nagṃ spṛ̱ṇute |
ya e̱vaṃ veda̍ | ityu̍pa̱niṣa̍t || 9||

oṃ sa̱ha nā̍vavatu | sa̱ha nau̍ bhunaktu | sa̱ha vī̱rya̍ṃ karavāvahai |
te̱ja̱svi nā̱vadhī̍tamastu̱ mā vi̍dviṣā̱vahai̍ |

oṃ śānti̱ḥ śānti̱ḥ śānti̍ḥ ||


bhṛgu̱rvai vā̍ru̱ṇiḥ | varu̍ṇa̱ṃ pita̍ra̱mupa̍sasāra |
adhī̍hi bhagavo̱ brahmeti̍ | tasmā̍ e̱tatpro̍vāca |
anna̍ṃ prā̱ṇaṃ cakṣu̱ḥ śrotra̱ṃ mano̱ vāca̱miti̍ |
tagṃ ho̍vāca | yato̱ vā i̱māni̱ bhūtā̱ni̱ jāya̍nte |
yena̱ jātā̍ni̱ jīva̍nti |
yatpraya̍ntyabhisaṃvi̍śanti | tadviji̍jñāsasva | tad brahmeti̍ |
sa tapo̎tapyata | sa tapa̍sta̱ptvā || 1|| iti prathamo'nuvākaḥ ||

anna̱ṃ brahmeti̱ vya̍jānāt | a̱nnāddhye̍va khalvi̱māni̱
bhutā̍ni̱ jāya̍nte | anne̍na̱ jātā̍ni̱ jīva̍nti |
anna̱ṃ praya̍ntyabhisaṃvi̍śa̱ntīti̍ | tadvi̱jñāya̍ |
puna̍reva varu̍ṇa̱ṃ pita̍ra̱mupa̍sasāra | adhī̍hi bhagavo̱ brahmeti̍ |
tagṃ ho̍vāca | tapa̍sā̱ brahma viji̍jñāsasva | tapo̱ brahmeti̍ |
sa tapo̎tapyata | sa tapa̍sta̱ptvā || 1|| iti dvitīyo'nuvākaḥ ||

prā̱ṇo bra̱hmeti̱ vya̍jānāt |
prā̱ṇāddhye̍va khalvi̱māni̱ bhūtā̍ni̱ jāya̍nte |
prā̱ṇena̱ jātā̍ni̱ jīva̍nti | prā̱ṇaṃ praya̍ntyabhisaṃvi̍śa̱ntīti̍ |
tadvi̱jñāya̍ | puna̍re̱va varu̍ṇa̱ṃ pita̍ra̱mupa̍sasāra |
adhī̍hi bhagavo̱ brahmeti̍ | tagṃ ho̍vāca |
tapa̍sā̱ brahma̱ viji̍jñāsasva | tapo̱ brahmeti̍ |
sa tapo̎tapyata | sa tapa̍sta̱ptvā || 1|| iti tṛtīyo'nuvākaḥ ||

mano̱ brahmeti̱ vya̍jānāt | mana̍so̱ hye̍va khalvi̱māni̱
bhūtāni̱ jāya̍nte | mana̍sā̱ jātā̍ni̱ jīva̍nti |

mana̱ḥ praya̍ntya̱bhisaṃvi̍śa̱ntīti̍ | tadvi̱jñāya̍ |
puna̍re̱va varu̍ṇa̱ṃ pita̍ra̱mupa̍sasāra | adhī̍hi bhagavo̱ brahmeti̍ |
tagṃ ho̍vāca | tapa̍sā̱ brahma̱ viji̍jñāsasva | tapo̱ brahmeti̍ |
sa tapo̎tapyata | sa tapa̍sta̱ptvā || 1|| iti caturtho'nuvākaḥ ||

vi̱jñāna̱ṃ brahmeti̱ vya̍jānāt |
vi̱jñānā̱ddhye̍va khalvi̱māni̱ bhūtā̍ni̱ jāya̍nte |
vi̱jñāne̍na̱ jātā̍ni̱ jīva̍nti |
vi̱jñāna̱ṃ praya̍ntya̱bhisaṃvi̍śa̱ntīti̍ | tadvi̱jñāya̍ |
puna̍re̱va varu̍ṇa̱ṃ pita̍ra̱mupa̍sasāra | adhī̍hi bhagavo̱ brahmeti̍ |
tagṃ ho̍vāca | tapa̍sā̱ brahma̱ viji̍jñāsasva | tapo̱ brahmeti̍ |
sa tapo̎tapyata | sa tapa̍sta̱ptvā || 1|| iti pañcamo'nuvākaḥ ||

ā̱na̱ndo bra̱hmeti̱ vya̍jānāt |
ā̱nandā̱dhye̍va khalvi̱māni̱ bhūtā̍ni̱ jāya̍nte |
ā̱na̱ndena̱ jātā̍ni̱ jīva̍nti | ā̱na̱ndaṃ praya̍ntya̱bhisaṃvi̍śa̱ntīti̍ |
saiṣā bhā̍rga̱vī vā̍ru̱ṇī vi̱dyā | pa̱ra̱me vyo̍ma̱nprati̍ṣṭhitā |
sa ya e̱vaṃ veda̱ prati̍tiṣṭhati | anna̍vānannā̱do bha̍vati |

ma̱hānbha̍vati pra̱jayā̍ pa̱śubhi̍rbrahmavarca̱sena̍ |
ma̱hān kī̱rtyā || 1|| iti ṣaṣṭho'nuvākaḥ ||

anna̱ṃ na ni̍ndyāt | taḏvratam | prā̱ṇo vā anna̍m |
śarī̍ramannā̱dam | prā̱ṇe śarī̍ra̱ṃ prati̍ṣṭhitam |
śarī̍re prā̱ṇaḥ prati̍ṣṭhitaḥ | ta̱de̱tadanna̱manne̱ prati̍ṣṭhitam |
sa ya e̱tadanna̱manne̱ prati̍ṣṭhita̱ṃ veda̱ prati̍tiṣṭhati |
anna̍vānannā̱do bha̍vati |

ma̱hānbha̍vati pra̱jayā̍
pa̱śubhi̍rbrahmavarca̱sena̍ | ma̱hān kī̱rtyā || 1||
iti saptamo'nuvākaḥ ||

anna̱ṃ na pari̍cakṣīta | taḏvratam | āpo̱ vā anna̍m |
jyoti̍rannā̱dam | a̱psu jyoti̱ḥ prati̍ṣṭhitam |
jyoti̱ṣyāpa̱ḥ prati̍ṣṭhitāḥ | tade̱tadanna̱manne̱ prati̍ṣṭhitam |
sa ya e̱tadanna̱manne̱ prati̍ṣṭhita̱ṃ veda̱ prati̍tiṣṭhati |
anna̍vānannā̱do bha̍vati |

mahā̱nbha̍vati pra̱jayā̍
pa̱śubhi̍rbrahmavarca̱sena̍ |

ma̱hān kī̱rtyā || 1||
ityaṣṭamo'nuvākaḥ ||

anna̍ṃ ba̱hu ku̍rvīta | taḏvratam | pṛ̱thi̱vī vā anna̍m |
ā̱kā̱śo̎nnā̱daḥ | pṛ̱thi̱vyāmā̍kā̱śaḥ prati̍ṣṭhitaḥ |
ā̱kā̱śe pṛ̍thi̱vī prati̍ṣṭhitā |
tade̱tadanna̱manne̱ prati̍ṣṭhitam |
sa ya e̱tadanna̱manne̱ prati̍ṣṭhita̱ṃ veda̱ prati̍tiṣṭhati |
anna̍vānannā̱do bha̍vati |

ma̱hānbha̍vati pra̱jayā̍
pa̱śubhi̍rbrahmavarca̱sena̍ | ma̱hānkī̱rtyā || 1||
iti navamo'nuvākaḥ ||

na kañcana vasatau pratyā̍cakṣī̱ta | taḏvratam |
tasmādyayā kayā ca vidhayā bahva̍nnaṃ prā̱pnuyāt |
arādhyasmā annami̍tyāca̱kṣate |
etadvai mukhato̎nagṃ rā̱ddham |
mukhato'smā a̍nnagṃ rā̱dhyate |
etadvai madhyato'nagṃ rā̱ddham |

madhyato'smā a̍nnagṃ rā̱dhyate |
edadvā antato̎nnagṃ rā̱ddham |
antato'smā a̍nnagṃ rā̱dhyate || 1||

ya e̍vaṃ ve̱da | kṣema i̍ti vā̱ci | yogakṣema iti prā̍ṇāpā̱nayoḥ |
karme̍ti ha̱stayoḥ | gatiri̍ti pā̱dayoḥ | vimuktiri̍ti pā̱yau |
iti mānuṣī̍ḥ samā̱jñāḥ | atha dai̱vīḥ | tṛptiri̍ti vṛ̱ṣṭau |
balami̍ti vi̱dyuti || 2||

yaśa i̱ti pa̱śuṣu | jyotiriti na̍kṣatre̱ṣu |
prajātiramṛtamānanda i̍tyupa̱sthe | sarvami̍tyākā̱śe |
tatpratiṣṭhetyu̍pāsī̱ta | pratiṣṭhā̍vān bha̱vati |
tanmaha ityu̍pāsī̱ta | ma̍hānbha̱vati | tanmana ityu̍pāsī̱ta |
māna̍vānbha̱vati || 3||

tannama ityu̍pāsī̱ta | namyante̎smai kā̱māḥ |
tadbrahmetyu̍pāsī̱ta | brahma̍vānbha̱vati |
tadbrahmaṇaḥ parimara ityu̍pāsī̱ta |
paryeṇaṃ mriyante dviṣanta̍ḥ sapa̱tnāḥ |
pari ye'priyā̍ bhrātṛ̱vyāḥ |
sa yaścā̍yaṃ pu̱ruṣe | yaścāsā̍vādi̱tye | sa eka̍ḥ || 4||

sa ya̍ eva̱ṃvit | asmāllo̍kātpre̱tya |
etamannamayamātmānamupa̍saṅkra̱mya |
etaṃ prāṇamayamātmānamupa̍saṅkra̱mya |
etaṃ manomayamātmānamupa̍saṅkra̱mya |
etaṃ vijñānamayamātmānamupa̍saṅkra̱mya |
etamānandamayamātmānamupa̍saṅkra̱mya |
imām̐llokankāmānnī kāmarūpya̍nusa̱ñcaran |
etat sāma gā̍yannā̱ste | hā 3 vu̱ hā 3 vu̱ hā 3 vu̍ || 5||

a̱hamannama̱hamannama̱hamannam |
a̱hamannā̱do'3̱hamannā̱do'3̱ahamannā̱daḥ |
a̱hagṃ śloka̱kṛda̱hagṃ śloka̱kṛda̱hagṃ śloka̱kṛt |
ahamasmi prathamajā ṛtā3sya̱ |
pūrvaṃ devebhyo'mṛtasya nā3bhā̱yi̱ |
yo mā dadāti sa ideva mā3''vā̱ḥ |
a̱hamanna̱manna̍ma̱danta̱mā3dmi̱ |
aha̱ṃ viśva̱ṃ bhuva̍na̱mabhya̍bha̱vā3m |
suva̱rna jyotī̍ḥ | ya e̱vaṃ veda̍ | ityu̍pa̱niṣa̍t || 6||
iti daśamo'nuvākaḥ ||

|| iti bhṛguvallī samāptā ||

oṃ sa̱ha nā̍vavatu | sa̱ha nau̍ bhunaktu | sa̱ha vī̱rya̍ṃ karavāvahai |
te̱ja̱svi nā̱vadhī̍tamastu mā vi̍dviṣā̱vahai̍ |

|| oṃ śānti̱ḥ śānti̱ḥ śānti̍ḥ ||

|| hariḥ oṃ ||